వీడియోతో అడ్డంగా బుక్కయిన రెజ్లర్ సుశీల్ కుమార్.. మర్డర్ కేసులో ట్విస్ట్

https://ift.tt/3hNREej

భారత సీనియర్ రెజ్లర్ సుశీల్ కుమార్ మర్డర్ కేసులో పూర్తిగా ఇరుక్కుపోయాడు. యువ రెజ్లర్ సాగర్ రాణా (23) హత్య కేసులో ప్రధాన నిందితుడిగా ఉన్న సుశీల్ కుమార్.. రెండు వారాల తర్వాత పోలీసులకి చిక్కిన విషయం తెలిసిందే. ఈ మేరకు కోర్టులో అతడ్ని ప్రవేశపెట్టిన ఢిల్లీ పోలీసులు.. సంచలన విషయాలు వెల్లడించారు. సాగర్ రాణా తనని అందరి ముందు అవమానపరచడంతో పగతో రగిలిపోయిన సుశీల్ కుమార్.. విచక్షణారహితంగా సాగర్ రాణా, అతని స్నేహితుడు సోనుపై దాడి చేసినట్లు వీడియో సాక్ష్యాన్ని పోలీసులు కోర్టుకి అందజేశారు. రెజ్లింగ్ వర్గాల్ని భయపెట్టడానికి సుశీల్ కుమార్.. తన స్నేహితుడు ప్రిన్స్‌ని ఆ దాడి వీడియోని తీయనమి కోరినట్లు పోలీసులు తెలిపారు. ఇప్పుడు మర్డర్ కేసులో ఆ వీడియో సాక్ష్యం కీలకంగా మారింది. అసలు ఏం జరిగిందంటే..? సుశీల్ కుమార్ ఇంట్లోనే అద్దెకి ఉన్న సాగర్‌.. అద్దె విషయమై అతనితో గొడవపడ్డాడు. ఈ క్రమంలో ఛత్రశాల స్టేడియంలో సుశీల్ కుమార్‌ని అవమానించేలా సాగర్ మాట్లాడటంతో.. సుశీల్ కుమార్ తట్టుకోలేకపోయాడు. దాంతో.. తన స్నేహితులతో కలిసి సాగర్‌‌పై స్టేడియం పరిసరాల్లోనే దాడికి దిగాడు. ఈ దాడిలో తీవ్రంగా గాయపడిన సాగర్ ఆసుపత్రిలో చికిత్స పొందుతూ చనిపోగా.. అతని స్నేహితుడు సోను ఆసుపత్రిలో చికిత్స తీసుకుంటున్నాడు. సాగర్ రాణా చనిపోవడంతో అజ్ఞాతంలోకి వెళ్లిపోయిన సుశీల్ కుమార్‌ కోసం రెండు వారాలకి పైగా పోలీసులు గాలించారు. ఈ క్రమంలో అతనిపై లుకౌట్ నోటీసులు, నాన్‌ బెయిలబుల్ వారెంట్, రూ.1 లక్ష రివార్డ్ కూడా ప్రకటించారు. అయితే.. ఎట్టకేలకి మీరట్‌లో రెండు రోజుల క్రితం సుశీల్ కుమార్ పోలీసులకి చిక్కాడు. సాగర్ రాణా హత్య తర్వాత సుశీల్ కుమార్ అజ్ఞాతంలోకి వెళ్లిపోవడానికి కాలా జతేది అనే గుండా కారణమని పోలీసుల విచారణలో తేలింది. సాగర్ రాణా స్నేహితుడు సోను స్వయానా జతేదికి మేనల్లుడు. దాంతో.. ఆ గుండా తనని ఏమైనా చేస్తాడేమో..? అనే భయంతో సుశీల్ కుమార్ అజ్ఞాతంలోకి వెళ్లిపోయాడట. మర్డర్ కేసులో ఇరుక్కున్న సుశీల్ కుమార్‌కి తాము ఎలాంటి సాయం చేయలేమని భారత రెజ్లింగ్ సమాఖ్య ఇప్పటికే స్పష్టం చేసింది. మొత్తంగా రెజ్లింగ్ వర్గాల్ని భయపెట్టాలని వీడియో తీయించిన సుశీల్ కుమార్.. తానే అడ్డంగా దొరికిపోయాడు.

CreditsKabaddi News, Football, Tennis, Hockey News, Badminton, More Sports News in Telugu