మిల్ఖా సింగ్‌కు కరోనా పాజిటివ్.. జాగింగ్ నుంచి తిరిగొచ్చాక..?

https://ift.tt/3v6oY42

అథ్లెటిక్స్ లెజెండ్ కరోనా బారిన పడ్డారు. ఆయనకు బుధవారం సాయంత్రం కోవిడ్‌ పాజిటివ్‌గా నిర్ధారణ అయ్యింది. ప్రస్తుతం ఆయన ఛండీ‌గఢ్‌లోని తన నివాసంలో హోం ఐసోలేషన్‌లో ఉన్నారు. మిల్ఖా సింగ్ ఆరోగ్యం నిలకడగా ఉందని ఆయన భార్య నిర్మల్ కౌర్ తెలిపారు. మిల్ఖా సింగ్ ఇంట్లో పని చేసే ఒకరికి కొద్ది రోజుల క్రితం కరోనా సోకినట్లు తేలింది. దీంతో కుటుంబ సభ్యులు టెస్టులు చేయించుకున్నారు. మిల్ఖా సింగ్‌కు హై ఫీవర్ వచ్చిందని.. కానీ టేస్ట్, స్మెల్ తెలుస్తున్నాయని ఆయన భార్య తెలిపారు. ‘‘నేను పూర్తి ఫిట్‌గా ఉన్నాను. బుధవారం రోజు జాగింగ్ నుంచి తిరిగొచ్చాక నాకు పాజిటివ్ అనే రిపోర్ట్ చూసి ఆశ్చర్యపోయాను. నేను పూర్తి ఆరోగ్యంగా ఉన్నాను’’అని 91 ఏళ్ల ఏళ్ల మిల్ఖా సింగ్ తెలిపారు. మిల్ఖా సింగ్, ఆయన కుమారుడు, గోల్ఫర్ అయిన జీవ్ మిల్ఖా సింగ్ కరోనాపై పోరు కోసం రూ.2 లక్షల విరాళమిచ్చాడు. ది ఫ్లైయింగ్ సిఖ్‌గా గుర్తింపు పొందిన మిల్ఖా సింగ్.. ఎన్నో చిరస్మరణీయ రేసుల్లో పాల్గొన్నారు. కామన్వెల్త్ క్రీడల్లో బంగారు పతకం సాధించిన తొలి భారత అథ్లెట్‌గా మిల్ఖా సింగ్ గుర్తింపు పొందారు. 1958 కామన్వెల్త్ గేమ్స్‌లో మిల్ఖా సింగ్ స్వర్ణం గెలిచారు. 1956, 1960, 1964 ఒలంపిక్స్‌లో భారత్ తరఫున ప్రాతినిధ్యం వహించారు. భారత ప్రభుత్వం అతడ్ని పద్మ శ్రీ పురస్కారంతో సత్కరించింది. 1960లో రోమ్‌లో జరిగిన ఒలింపిక్స్‌లో 400 మీటర్ల పరుగు పందెంలో ఫైనల్ చేరిన ఆయన.. తుది పోరులో నాలుగో స్థానంలో నిలిచారు. 0.1 సెక్లన తేడాతో పతకం చేజార్చుకున్నారు. కానీ ఒలింపిక్స్‌‌లో ఫైనల్ చేరిన తొలి భారత పురుష అథ్లెట్‌గా రికార్డ్ క్రియేట్ చేశారు. 91 ఏళ్ల వయసులోనూ మిల్ఖా సింగ్ పూర్తి ఫిట్‌గా ఉన్నారు. నిత్యం జాగింగ్ చేయడంతోపాటు ఎక్సర్‌సైజ్‌లు చేస్తుంటారు. కరోనా సమయంలో రోజూ 15 నుంచి 20 నిమిషాలు ఎక్సర్‌సైజ్ చేయాలని ఆయన పిలుపునిచ్చారు. తమ కుటుంబంలో అందరం రోజూ అరగంటపాటు వ్యాయామం చేస్తామని మిల్ఖా సింగ్ తెలిపారు. కరోనాను పారద్రోలడానికి ఎక్సర్‌సైజ్ చేయడం ఆవశ్యకమన్నారు. తాను మితంగా భోజనం చేస్తానని.. వేకువజామునే నిద్రలేచి జాగింగ్ చేస్తానని మిల్ఖా సింగ్ గతంలో తెలిపారు. కొద్దిపాటి అనారోగ్యం తలెత్తినా తాను ఎలాంటి మందులు వేసుకోనని.. జాగింగ్ చేస్తే అదే తగ్గిపోతుందన్నారు. 91 ఏళ్ల మిల్ఖా సింగ్ కరోనాను జయించాలని అభిమానులు ఆకాంక్షిస్తున్నారు.

CreditsKabaddi News, Football, Tennis, Hockey News, Badminton, More Sports News in Telugu